Адбыўшы 15 сутак адміністрацыйнага арышту, 29 сакавіка выйшаў на волю журналіст і прафсаюзны актывіст Віктар Стукаў.
Сілавікі затрымалі Віктара Стукава 14 сакавіка дома ў Полацку. У жыллі правялі ператрус, забралі тэхніку і ўсю атрыбутыку, якая была бела-чырвона-белага колеру. Пасля Віктара завезлі ў Полацкі ізалятар часовага ўтрымання. На наступны дзень, 15 сакавіка, яго судзілі паводле ч. 2 арт. 19.11 КаАП. Нагодай стала падабайка у сацыяльнай сетцы Facebook пад матэрыялам з YouTube-канала «Радыё Свобода».
Суддзя Уладзімір Бясецкі прызнаў Віктара Стукава вінаватымі і прызначыў 15 сутак адміністрацыйнага арышту.
У часе судовага працэсу журналіст не пагадзіўся з абвінавачаннем і сказаў, што да стварэння дадзенай старонкі ў Facebook не мае ніякага дачынення.
Адбываць прызначанае пакаранне Віктара Стукава адвезлі ў Віцебскі ІЧУ. Там ён сядзеў у васьмімясцовай камеры, у якой часам было 9 чалавек. Ставіліся ў віцебскім ізалятары да арыштаваных, як да ўсіх палітзняволеных у Беларусі: не давалі матрацаў і пасцельнай бялізны, Віктару нават даводзілася спаць на падлозе. Па гэтай прычыне ён выйшаў на волю захварэўшы.
Журналіст наймаў адваката, і той ад яго імя абскарджваў пастанову Полацкага райсуда ў Віцебскім абласным судзе. Але безвынікова.
Нагадаем, якраз напярэдадні затрымання Віктара Стукава выйшла на волю яго жонка Святлана Стукава, якая таксама была арыштаваная судом паводле ч. 2 арт. 19.11 КаАП і адсядзела 15 сутак, пасля жанчыну звольнілі з працы.
Чытайце яшчэ:
«Бачу палярнае стаўленне да беларусаў». Што абмяркоўвалі на журналісцкай сустрэчы ў Кіеве
Лукашэнка ў зняважлівай форме прапанаваў памяняць Пачобута на Латушку
Абвяшчэнне вынікаў разгляду апеляцый прафсаюзных актывістаў перанеслі на 3 красавіка